• 主頁
  • 宣傳活動
  • 減廢回收2.0
  • 「大嘥鬼」與「慳BB」的環保故事

「大嘥鬼」與「慳BB」的環保故事

2020年

【鬼鬼不思議事件】

【鬼鬼不思議事件】

本鬼今日親征「綠在區區」做回收,突然回收桶傳出一陣陣高頻率嘅「慳~慳~」聲!本應拔腿就跑嘅我掩蓋唔住澎湃嘅好奇心,決定上前一探究竟,見到嘅係……

不明飛行物?!佢仲眼定定望住啲回收物,好興奮咁彈嚟彈去。我唔小心同佢有咗一秒眼神接觸,只係一秒!佢就向我飛過嚟,仲跟住我趕極唔走!

唉,咪睇本鬼外表咁瀟灑,其實暗藏一顆溫柔的心,我都唔忍心掉低佢一個喺度,不如帶佢返屋企先再從長計議。

呢隻乜嘢,「慳~慳~」咁叫,叫佢乜名好呢??就叫住……「慳BB」……先啦

【慳BB念力初體驗】

【慳BB念力初體驗】

有一晚,我喺屋企整理緊準備拎去回收嘅廢紙,慳BB突然彈嚟彈去,漸變成藍色,仲食我手上嘅紙張!我完全唔知發生咩事,但見慳BB食得咁猴擒又驚佢哽親,於是飛奔去廚房斟水俾佢。

神奇嘅事就喺呢個時候發生,我從廚房出嚟,原先嘅廢紙已經唔見咗,剩係得一疊再造紙!莫非慳BB有「轉廢為材」嘅念力?本鬼不禁陷入沉思……

【慳BB抓周party】

【慳BB抓周party】

為咗更加了解慳BB嘅取向,本鬼特登為慳BB安排一個抓周 party ,喺佢面前放咗六類物品,睇吓佢鍾意咩先?

原來慳BB對住各種回收物會瞬間心心眼,仲會變身添!

經本鬼六六大順測試預卜,咁我知慳BB嘅「發意所取」喇!

【玻璃回收 識唔識?】

【玻璃回收 識唔識?】

夏日炎炎,本鬼嘆返支凍冰冰嘅汽水消吓暑先!

慳BB見到個乾淨玻璃樽,立即變綠,得咗?仲「轉廢為材」,玻璃樽變環保建材,無得彈!

近年全港玻璃樽回收已有重要突破,大量玻璃樽回收後,經壓碎等過程化成玻璃沙,可代替海沙鋪路填海,又可混入英泥等製成環保地磚或其他綠色建材,多元出路,令本地可盡量全部吸納!

識到慳BB呢位朋友,真係開心喇!我以後每樽玻璃,都要乾淨回收!

【乜電乜電乜電乜電都回收】

【乜電乜電乜電乜電都回收】

慳BB咁like回收物,唔怪得本鬼會喺社區回收站「綠在區區」見到佢啦!今日,我哋舊地重遊。

喺「綠在區區」,佢見到有四電一腦、小型家電、慳電膽/光管同埋充電池共四大類回收安排,好方便整全,似回收自助大餐,興奮!

佢全身仲變成紅噹噹,點解呢?

【回收要乾淨】

【回收要乾淨】

天氣咁熱,本鬼特登買咗樽大支裝凍飲嘆吓!本鬼打開雪櫃,慳BB見到裡面有可回收物就好興奮,於是我嗱嗱臨飲咗大半支凍飲,就滿心歡喜咁俾個樽佢啦。本鬼有求必應,係咪好老友先?

點知……慳BB竟然嘔吐大作,原來係我做得唔夠好,無將個樽清空乾淨,搞到佢咁唔舒服,連累回收受阻,自責ing……

你哋回收D樽時,記得清空同乾淨呀!

【回收鋁罐 記得乾淨】

【回收鋁罐 記得乾淨】

雖然本鬼貴為環保KOL,但係同慳BB相處,仲有好多嘢要學!

我帶咗袋鋁罐俾慳BB,睇佢變色就知佢開心啦!但係今次有鋁罐唔乾淨,搞到慳BB唔舒服喇!

大家千祈唔好學我,回收前記得鋁罐回收要乾淨呀!

【眾志成城 為慳BB】

【眾志成城 為慳BB】

近日廢寢忘餐,本鬼製作咗一款AR濾鏡遊戲,希望同咁多位和慳BB一齊支持乾淨回收,轉廢為材。


有關遊戲連結,請瀏覽Facebook或Instagram專頁。

【大嘥鬼AR遊戲之「電燈膽」篇】

【大嘥鬼AR遊戲之「電燈膽」篇】

「能迴避嘛 我怕了當那電燈膽」

如果係慳電膽嘅話,又使咩怕喎,因為用完之後可以回收!直管同其他形狀嘅光管,以及高強度氣體放電燈,都可以回收架。記得用新燈管嘅包裝物料包返好支舊燈,破爛嘅燈管就要密封,過程中記得要保持安全喔!

包好慳電膽/光管,可拿去各屋苑慳電膽/光管回收箱(全港約有1,500屋苑收集點),或帶去綠在區區同社區回收中心/街站,咪唔洗喺條街俾人閃到盲囉

冇伴侶,So what?我有慳BB呢個好朋友都唔差喇!若胡亂丟棄慳電膽/光管,危害環境及前線工友,要迴避呀!

本鬼嘅AR遊戲中亦有「慳電膽/光管」類別,一定難唔到你哋啦!

【My Pen Is Blue, My Friend Is You】

【My Pen Is Blue, My Friend Is You】

話咁快慳BB就嚟咗屋企一個月,見佢平時咁十卜我,就等本鬼帶佢去蒲返次啦!

嗱,我講緊嘅係貼紙相app咋,我哋好乖留喺屋企少出街架,乖過同慳過凱婷好多!唔好睇小我同慳BB嘅潛力,靚起上嚟,就好似漆黑中嘅螢火蟲,咁鮮明,咁出眾!

【大嘥鬼AR遊戲之「文青大嘥鬼」篇】

【大嘥鬼AR遊戲之「文青大嘥鬼」篇】

本鬼充滿住文青氣息,閱讀、寫作係我嘅嗜好,雖然撐電子化,但都有廢紙。今日係我自己大意,廢紙濕咗水,搞到慳BB反肚又嘔吐,連我嘅文青造型都保唔住!

為咗唔好重蹈覆轍,回收文書紙、報紙及紙皮時,記住唔好濕水呀!雜質如釘裝鐵圈膠圈、書釘、萬字夾、膠面同膠紙等,宜可除則除。

以上講嘅廢紙種類都會出現喺本鬼嘅AR遊戲架,咁你知點攞高分啦!

【大嘥鬼AR遊戲之「十萬伏特」篇】

【大嘥鬼AR遊戲之「十萬伏特」篇】

「十萬伏特」唔係本鬼嘅絕招,而係陷阱啊!

充電池宜回收,你哋仲要知回收時注意咩?為確保儲存或運送過程嘅安全,宜回收前要喺充電池嘅金屬尾端宜封好,例如貼上皺紋膠紙。

另外,可能有機會破損嘅充電池就宜用膠袋(例如係新購電池嘅膠袋)及膠紙封妥後先去回收。

係咪學到嘢呢?咁玩本鬼嘅AR遊戲時,抽到「充電池」類別你知點回收啦!

【大嘥鬼AR遊戲之「在家回收」篇】

【大嘥鬼AR遊戲之「在家回收」篇】

本鬼嘅屋企首次曝光,有啲怕醜,但為咗傳授環保知識,我準備好豁出去!

你哋知唔知圖中我屋企嘅電器,有幾多係可以回收?答案係全部!係全部啊!你諗得出嘅小型電器,原來好多都可以回收,當中嘅相機、吸塵機同風扇更會喺我最新嘅AR遊戲中亮相,唔好話我唔俾貼士你。

【「蛋撻頭」篇】

【「蛋撻頭」篇】

本鬼set完個靚頭,支定型噴霧啱啱用完,可唔可以俾慳BB回收處理呢?

原來有三大類金屬不宜回收:曾用於盛載壓縮氣體或化學物品嘅金屬容器、由金屬同其他物料製造但難以分離嘅複合物品,以及受污染嘅金屬容器。

相反,鐵/鋁罐、煮食器具、食品容器(如月餅罐)、奶粉罐,呢啲都可以回收,佢哋仲會出現喺我新出嘅AR遊戲添!

【大文豪鬼鬼】

【大文豪鬼鬼】

雖然書展延咗期,但本鬼都出咗本寫真~丫唔係,係文青繪本至真!仲要免費任睇,我班fan屎有福了

靜靜雞話埋俾你知,睇完再玩本鬼嘅AR遊戲會叻啲架,因為隨書附送咗回收小貼士。小貼士係咩?係本鬼為左大家著想,又自揭瘡疤 (個個都拍拖,唔通個個都想拍拖咩……)

記得玻璃鞋咁硬又難打碎,係唔可以回收嫁,而回收玻璃容器嘅招紙就唔洗特登撕出黎!

【鬼鬼環保補習班】

【鬼鬼環保補習班】

今日本鬼化身補習天王,同慳BB助教講吓「減廢回收2.0」呢個計劃除咗推動源頭減廢,仲會從以下四層面提升回收配套

私人空間:開始了廢膠回收服務先導計劃 (東區、沙田及觀塘3區先行),並新設「綠展隊」外展服務予實地協助

綠在社區:整合綠在區區、社區回收中心及新增回收街站,共計將近100點,服務全港18區

智能空間:實施「入樽機」及智能回收箱應用先導計劃,回收飲品膠樽及其他可回收物

行人空間:提升路邊回收桶服務及改善設計,逐步轉型

【必試!零糖零脂肪1分鐘紙沙律】

【必試!零糖零脂肪1分鐘紙沙律】

居家抗疫日日都喺屋企食食食,不少人都肥咗成個碼。慳BB食到就嚟飛唔起喇

本鬼決定發揮烹飪小宇宙,幫慳BB度身訂造健康食譜,煮呢款用三種廢紙做材料嘅輕盈沙律。紙係木造,即係素啦,多啲食健康啲,嘿嘿

問題係本鬼屋企啲廢紙用得七七八八喇,大家快啲幫手將啲唔要嘅紙皮、報紙同辦公室用紙,攞去回收。慳BB好大食哦!

本鬼見到張報紙,話環保署今年為香港廢紙回收帶來新機遇,已經請咗十幾個承辦商,從全港各區收集廢紙,轉廢為材。大家都多啲支持乾淨回收廢紙,地球都健康啲!

【大嘥.鬼.節】

【大嘥.鬼.節】

提提你,今日係農曆七月十四……

我哋係唔收有鬼嘅電視機架!無鬼嘅小型電器同四電一腦,就全部都可以回收!

回收四電一腦:
2676 8888 或 https://weee.gov.hk/

回收小型電器:
https://www.wastereduction.gov.hk/tc/assistancewizard/recyc_note.htm

【極速健身不是夢】

【極速健身不是夢】

為咗幫慳BB健康啲,今日本鬼請到匿獅Lion出山,同我哋一齊視像運動,睇吓本鬼郁到身水身汗咁,幾有活力!

喂呀慳BB,你淨係hea郁條尾係健唔到身喎!

出身汗後梗係渴,慳BB望住匿獅Lion飲完支飲品,仲想要埋佢個膠樽回收再造!本鬼就認為健完身飲野,最健康係自備水樽,對自己同地球都身體健康啲!

慳BB最近見到媒體報導,環保署喺今年底為飲品膠樽回收帶來新機遇,先導計劃已經請左承辦商,會喺港九新界擺放共60部智能入樽機,仲會考慮提供回贈,鼓勵公眾交番啲飲品膠樽,支持乾淨回收。依個先導計劃係配合將來「塑膠飲料容器生產者責任計劃」,大家都多啲支持減廢喇!

【口罩肌護理小貼士】

【口罩肌護理小貼士】

日日戴住口罩,粒粒都生多咗!貪靚嘅本鬼會用燕麥同水每星期磨砂一次,保持皮膚光滑靚靚

市面上有啲個人護理產品用微膠粒製造,快啲搵出屬於你嘅自製配方或天然產品,同我一齊膠少啲

環保署剛剛完成咗香港微膠珠污染管制策略嘅研究,而家密鑼緊鼓籌備緊自願淘汰含微膠珠個人護理及化妝品計劃, 到時大家想搵冇微膠珠嘅磨砂產品,就會更加更加方便啦 !記住密切留意呀!

【大嘥鬼話當年】

【大嘥鬼話當年】

本鬼當年做學生時最憎就係做功課,如果慳BB嗰時已經喺度,佢一定會為食到食晒我啲note屎,咁我咪有藉口唔交功課囉,嘿嘿!

新學年執書櫃個陣,記得捐舊書俾有需要嘅同學仔重用,或者攞去回收呀!

【兩層比一層浪費,三層又比兩層浪費】

【兩層比一層浪費,三層又比兩層浪費】

上網買樽維他命C啫,個紙盒居然有西瓜咁大,入面仲有幾重保護,唔講仲以為我買古董(哪有),下次都係出街買返......

網上購物留返有真正需要時先用,買嘅時候仲可以喺備註寫埋「包裝從簡」,咁就慳錢又環保!

【野餐不膠】

【野餐不膠】

秋季,最啱就係同慳BB去行山同野餐!我哋用自備嘅餐盒同餐具享受住香噴噴嘅小食,側邊嘅十二隻恐龍都流晒口水!

【邊慳邊嘆】

【邊慳邊嘆】

同慳BB去staycation!本鬼會自備牙刷牙膏、梳洗用品同拖鞋,實行咪大嘥!有時住多過一晚,仲會指示酒店重用床單同毛巾添,邊個話去玩一定要大嘥?

【一年容易又中秋】

【一年容易又中秋】

本鬼同慳BB都中秋兩團圓,惜食咪嘥!月餅我全都要,可以回收嘅月餅罐就留俾慳BB啦!

月餅罐亦可交去「綠在區區」、社區回收中心或有舉辦回收活動嘅機構,再唔係投入一般三色回收桶都得!中秋佳節,祝大家人月兩團圓!中秋月餅食後,眾月餅罐可回收團圓,就幸福啦!

【環保.智能.回收車】

【環保.智能.回收車】

10月,又係我鬼布斯一年一度嘅 show time。今次帶俾大家嘅係「社區智能回收車」!仲回收有禮!

「社區智能回收車」會游走各區,大家可以上去架車體驗下點樣將廢紙、金屬、塑膠同玻璃放入智能回收箱、賺取電子積分同使用禮品兌換機換取禮品的整個過程。參觀完,仲有紀念品添。智能卡一嘟,智能回收桶就會自動開門,以速算程式,測量同紀錄回收物料類別同重量,再換算你嘅電子回收積分;之後,就可以喺車上另一配備「禮物兌換機」換領我鬼布斯為你精心準備嘅心水禮物。整個流程自動自助,乾淨流暢。

「社區智能回收車」或可重新定義你嘅回收習慣。回收車將會走訪各區進行示範,詳情請按此。

【回收開chat】

【回收開chat】

想搵回收點呀?環運會chatbot啦!
想知有咩環保活動呀?環運會chatbot啦!

環境運動委員會 Environmental Campaign Committee嘅chatbot登場喇!只要喺環運會Facebook頁面撳「傳送訊息」,即可啟動chatbot功能,全港回收點位置一問就知,仲會醒你回收小貼士同最新環保活動消息。

唔使四圍騰,唔使四圍搵,入嚟睇埋嚟傾!

請按此使用環運會chatbot。

【很想去捕捉它】

【很想去捕捉它】

「社區智能回收車」出動喇!恭喜你獲得一個同本鬼&慳BB一齊試車嘅機會!

試車有咩玩?本鬼除咗預備定關於八種回收物嘅熱身小遊戲俾大家玩,仲邀請埋「綠展隊」醒你回收有禮嘅秘技。

「社區智能回收車」下一站並唔係去天后咁簡單,而係全港十八區呀!記得留意嚟緊嘅時間表,有關嘅安排會喺環保署減廢網站公布!快啲出嚟野生捕獲我哋!

【慳BB能力全分析】

【慳BB能力全分析】

慳BB憑住驚人嘅回收能力,成為本鬼嘅親密環保戰友!不過說話能力就……no eye see

回收物記得唔好揼,拎去回收唔單止幫到地球,仲可以餵飽慳BB添!

「綠在區區」同社區回收中心都可以回收八種回收物,仲有架「社區智能回收車」不定時出現係唔同地區,大家快啲攞回收物出嚟俾慳BB食啦!

【路邊回收桶 QR Code】

【路邊回收桶 QR Code】

本鬼所屬嘅組織環保署將由10月起,接收各區路邊回收桶。

就決定係你喇,出嚟啦!

路邊回收桶新裝配有 QR code,當大家見到滿咗,scan一scan,我哋嘅回收承辦商就會嚟處理。大家幫手,乾淨回收,滿咗通知聲,方便街坊又回收。

【陳年月曆出土】

【陳年月曆出土】

轉季執嘢搵到舊月曆?千祈唔好嘥,因為月曆嘅廢紙係可以回收架,記得宜去膠紙、除雜質,同埋咪濕水!

【低成本cosplay】

【低成本cosplay】

萬聖節就到,要扮鬼扮馬都唔使買新嘢嘅,好似我同慳BB咁,一人用一件舊T恤就成功扮鬼,既慳錢又環保。大家又有咩環保嘅cosplay idea?

【呢個人相當有嫌疑】

【呢個人相當有嫌疑】

慳BB近排機不離手,成日望住部電話陰陰嘴笑,又無端端帶禮物返屋企,形跡非常可疑!

本鬼按捺不住要偷睇佢電話喇!原來慳BB只係同環境運動委員會Environmental Campaign Committee嘅chatbot傾偈,佢哋仲提供好多環保活動嘅資訊,慳BB都參加咗唔少,唔怪得之佢整咗咁多得意可愛嘅手作仔啦!

請按此使用環運會chatbot。

【不消費的 11.11】

【不消費的 11.11】

今日雙十一,我同慳BB都冇打算瘋狂shopping,因為我哋已經好滿足。無論優惠有幾吸引,冇需要嘅話就唔好買喇。

雙十一唔一定要消費嘅,有朋友嘅陪伴已經好滿足!

【百萬富翁-to-be】

【百萬富翁-to-be】

面對呢條問題,我決定打電話問我老友——環境運動委員會Environmental Campaign Committee嘅chatbot,因為佢有齊八類回收物嘅資料同回收貼士,你有關於回收嘅問題都可以問佢架!

請按此使用環運會chatbot。

【回收便利點】

【回收便利點】

咦~咁多人嘅?原來大家唔係睇樓,而係爭住參觀新嘅「回收便利點」。

社區回收中心「回收便利點」外表sharp醒,內裡有齊八類回收物嘅收集設施,你都快啲去睇吓啦!

【鬼鬼 慳BB合體登場!】

【鬼鬼 慳BB合體登場!】

「啊!!!合體回收技!!!」

見到本鬼同慳BB一齊出現,就知一定唔簡單啦~憑住慳BB對回收物嘅「食力」,加埋本鬼對回收嘅努力,減廢回收話咁易!

【回收八式】

【回收八式】

鬼鬼我一拎一洗一掉,三扒兩撥就可以將回收物輕鬆分類,乾淨回收。但如果你自問無本鬼咁高強嘅武功,就記得要認清回收八式,好好咁做好分類回收,方便慳BB「轉廢為材」喇!

想了解八式回收物嘅資料,請瀏覽環保署減廢網站。

【回收膠樽時代】

【回收膠樽時代】

新上映嘅石器時代電影,令本鬼諗起當年咩都係用石用樹木,如今...... 咩都係膠,真係心痛死鬼鬼同慳BB。如果大家都識走塑、用少啲膠,又或者至少用完好好咁回收返,本鬼就心滿意足了~

【慳BB!努力呀!!】

【慳BB!努力呀!!】

慳BB同電視劇入面嘅「力圖」一樣咁“Little”,亦都同佢地一樣咁熱血㗎!無論幾辛苦都好,都會盡力將回收物好好接收!除咗慳B要努力之餘,都要靠大家嘅幫手,做好乾淨回收~你哋都會支持慳BB㗎可?

【回收點 All Around You…..】

【回收點 All Around You…..】

鬼鬼聽到有人話回收點好遠,唔方便。本鬼當堂嚇一跳,然後得啖笑~事關而家除咗有可以接收不少於8種回收物嘅「回收環保站」同「回收便利點」,仲有「回收流動點」𠻹,真係周圍都有回收點㗎!

拿拿拿~~咁多個回收點,你無藉口唔去回收喇掛?!一於儲夠回收物就一次過送去回收點喇,減少不必要外出呀!

【網購完啲包裝點處理?】

【網購完啲包裝點處理?】

啱啱過咗咁多個購物節,大家有冇好多收穫呢~唔知大家拆完份件之後,有無留意啲包裝可唔可以回收呢?各位東區、觀塘同沙田嘅朋友就可以將啲不能重用嘅廢塑膠放入已登記「塑膠回收先導計劃」處所內嘅回收桶啦。
一個桶,所有膠都收!
一個桶,所有膠都收!
一個桶,所有膠都收!
(重要訊息要講足3次!)

即刻睇吓下面有邊啲嘢可以拎去回收
√ 膠袋 (如:背心袋、米袋、包裝膠袋)
√ 膠容器 (如:膠樽、膠桶、膠箱、微波爐膠盒、乳酪杯、豆腐盒)
√ 發泡膠 (如:水果網、發泡膠箱、發泡膠防撞物料)
√ 膠餐具、光碟及包裝物料 (如: 膠餐具、膠飲管、光碟、包裝氣泡膜)

「塑膠回收先導計劃」詳情請按此。

【除非你做好回收 如果唔係你唔會夠我BW鬥BW鬥BW鬥........】

【除非你做好回收 如果唔係你唔會夠我BW鬥BW鬥BW鬥........】

「唔啱聽嘅說話你想唔想聽?」

本鬼發現慳B每次食完回收物就唔舒服,原來係因為大家無做好乾淨回收!!如果大家唔幫手做好乾淨回收,慳B無得好好咁將大家嘅回收物轉廢為材,佢就點都唔會夠我BW鬥。大家行多一步幫吓佢啦!

【環保造星】

【環保造星】

本鬼一早就覺得慳BB係可造之材,所以即使佢咁Cute,本鬼都絕對唔會心軟,好好咁訓練佢成為真正嘅環保之星!淨係得本鬼鞭策佢係唔夠㗎,要靠大家一齊俾多啲回收物佢食,等佢頻密鍛練轉廢為材嘅技巧,先可以成為更強嘅慳B!

【膠樽聖誕樹】

【膠樽聖誕樹】

本鬼身為環保界KOL,聖誕裝飾呢啲嘢梗係環保行先~同大家介紹返鬼鬼本年度嘅嘔心瀝血鉅作——膠樽聖誕樹!本鬼四周圍收集膠樽,再用咗好耐時間砌,真係靚得嚟又夠哂環保~

點知!你自己去片睇下發生咩事啦......

聖誕節還是要過~鬼鬼同慳B喺呢到祝大家Merry Christmas!最重要係如果有唔能夠重用嘅裝飾品或者包裝記得唔好亂揼,要好似鬼鬼同慳B咁乾淨回收呀!

【拆禮物Happy 回收好Easy】

【拆禮物Happy 回收好Easy】

萬人迷鬼鬼梗係收到好多聖誕禮物啦,最開心嘅就係收到張綠綠賞卡呀!Well 我前前後後仲叫埋鄰居陳師奶李小姐同好多朋友仔去開卡,大家一齊回收儲分換禮物~

哈~平時我都儲唔少喇,你哋都要努力儲下呀~

鬼鬼溫提:拆禮物拆得好開心嘅同時,記得將用完嘅包裝拎去回收,同提朋友下次走包裝就更好了!

【Happy New Year!!!】

【Happy New Year!!!】

話咁快就嚟到2020年最後一日,今年大家都居家抗疫,本鬼就約定你哋今晚11點59分50秒,準時開住鬼鬼同慳B呢條片一齊倒數啦!

相信大家今年喺本鬼同慳B嘅督促下都有乖乖做好乾淨回收嘅~應承我哋,下年繼續努力好無?

2021年

【2021回收點巡禮】

【2021回收點巡禮】

嚟到新一年,我哋嘅社區回收設施包括「回收環保站」、「回收便利點」同「回收流動點」會繼續喺各區為街坊服務,方便大家做好減廢回收。而「社區智能回收車」就會因應疫情調整出行時間表, 收集大家嘅回收物!另外,三區嘅「塑膠回收先導計劃」亦都會繼續進行㗎~本鬼偷偷哋話埋俾大家知嚟緊仲會有一部靚得嚟又可以回收飲品膠樽嘅「入樽機」,而家賣個關子先~想知佢幾時面世就跟住鬼鬼啦!

【認住呢個6字】

【認住呢個6字】

鬼鬼考考你,呢個係咩Logo?
咩話?唔好話我知你唔認得呀!

嗱~等本鬼提多你一次啦!呢個係綠在區區嘅Logo,大家喺街見到呢個6字嘅Logo,就係我哋嘅社區回收設施,可以拎回收物去乾淨回收㗎喇!認住佢喇喂!

【天線慳BB】

【天線慳BB】

「慳BB~慳BB~Say Hello!」

從前有隻好可愛嘅慳BB,佢好環保又鍾意食回收物,食咗8種回收物會變唔同顏色,仲會轉廢為材,所以佢嘅世界好乾淨,日日都生活得好開心好快樂~

【凌凌鬼事件簿】

【凌凌鬼事件簿】

話說鬼鬼有日唔覺意隨手將個用完嘅玻璃樽揼落垃圾桶,仲咁啱俾慳BB睇到,佢即刻嬲咗我足足一日呀,本鬼最後執返個樽揼去回收桶,佢先開心番咋!

凌凌鬼以後都會小心啲,知道「就算係一張廢紙、一個玻璃樽,都有佢本身嘅用處!」唔會再亂咁揼嘢㗎喇!

【慳在你心底的名字】

【慳在你心底的名字】

「Big Waster是我,慳B是你,W是環,B是保」,拼起來就是『環保waan4 bou2』。」

每個人心底都可能有一個「慳」嘅念頭,只係好多時一個唔覺意或者因為懶,就將呢樣嘢放低咗。唔好再收收埋埋,走出嚟啦,更光明嘅環保世界等緊你!

【嚇到個心離一離】

【嚇到個心離一離】

一個夜闌人靜嘅晚上,鬼鬼我喺屋企聽到「dee.....dee...deee」咁嘅聲。於是本鬼鼓起最大嘅勇氣去查探吓!點知差啲俾慳BB嚇鬼!!!!

想知發生咩事?自己睇片啦!

【「綠綠賞」有咩賞?】

【「綠綠賞」有咩賞?】

大家留意~鬼鬼有嘢益大家!而家拎2公斤或以上嘅回收物去「回收便利點」或者「回收流動點」️,就可以登記領取「綠綠賞」積分卡,儲分換禮物。積分可以用嚟換日常生活用品同糧油乾貨等等嘅禮物,大家仲可以同朋友或者屋企人一齊用一張積分卡,加快賺取積分𠻹!

部份回收便利點有新開張嘅推廣優惠,只要拎1公斤嘅回收物嚟就可以開卡,快啲去佢哋嘅Facebook page睇吓最新資訊啦!

【慳?邊到慳呀?睇過】

【慳?邊到慳呀?睇過】

我就叫大嘥鬼,環保界冇人唔識我嘅。

話說有日行行吓,有個膠樽突然飛埋嚟,仲掉中我個頭!我當堂火都嚟,捉住佢問吓佢係邊個咁大膽啦,嗰隻嘢係咁話「慳」,見佢識回收又識轉廢為材咁喎,本鬼就唔識佢喇,你哋有冇人識呢隻慳B呀?

【笑甚麼,慳B,你也是地球人】

【笑甚麼,慳B,你也是地球人】

只要你係地球人,地球嘅事就一定關你事!唔好再俾藉口自己,唔係講笑,努力做好減廢回收啦!

【喂完主子嘅罐罐唔好揼】

【喂完主子嘅罐罐唔好揼】

哎喲~主子真係太可愛喇!每日當佢發動喵喵喵攻勢,本鬼都忍唔住要俾罐罐佢食。點知慳BB又有樣學樣,擺個可愛樣出嚟,唯有餵佢食個罐囉~

本鬼最後提提大家~記得要清洗乾淨,撕走所有非金屬附件先拎去回收呀!

【鬼鬼慳B陪你執屋】

【鬼鬼慳B陪你執屋】

喂~新年喇!學鬼媽話齋:「屋企咁多嘢財神見到都唔入嚟啦!」

嗱嗱嗱~知你哋實話唔知點執㗎~跟住我雜物諮詢師鬼鬼嘅執屋三部曲,就冇藉口話唔識啦!

第1部:捐窿捐罅,搵吓屋企有冇「鬼鼠位」收埋咗啲回收物,再拎去回收。
第2部:留意吓有冇嘢係放咗喺度好耐一直唔用,掉咗又覺得浪費嘅,就轉贈俾有需要嘅人啦。
第3部:檢視完所有物品之後,將真係好有好有紀念價值嘅物品好好收藏。

大家明白啦嘛~有方向啦嘛~仲要記住唔可以咩都當垃圾咁揼,睇清楚有冇回收物呀!

【新人金獎得主 慳BB!】

【新人金獎得主 慳BB!】

咁多位!你唔係唔識呀?慳BB喎!雖然而家先出第一首派台歌(都有份唱幾句咁啦!)~

呢位新人開口埋口話「慳~」,又會食回收物變變變唔同嘅顏色,仲識「轉廢為材」,話俾大家知「回收點止三色咁簡單」!由大家最深刻嘅「藍廢紙、黃鋁罐、啡膠樽」,增加至8種回收物都收架啦!

下次喺街到見到阿鬼同慳BB,記得一齊Jam番首歌喇!

【最環保產物top100#賀年歌】

【最環保產物top100#賀年歌】

偷偷地話俾大家知,本鬼一直收埋咗一樣嘢好耐........就係珍藏版鬼鬼賀年大碟!年年都拎返隻絕密版大碟出嚟重用!重播!重用!重播!提升節日氣氛啦!

點知慳BB一個唔該就同我食咗佢。唉....見佢咁有心幫我拍MV上載去BWtube,「數碼化」咗隻碟之後,下年仲易拎出嚟播喇!!

【年初三赤口】

【年初三赤口】

激死本鬼喇!慳BB都聽唔明我講咩嘅!

講多兩句佢仲走咗去𠻹!!大家評吓理,你哋話邊個啱呀?

【慳BB育成記】

【慳BB育成記】

同慳BB相處咗一排,本鬼發現佢真係非常大食,餵極佢都仲係成日嗌肚餓!呢幾個月本鬼都攰啦......大家一齊幫幫手去下面條link餵飽慳BB啦!

不過大家要注意呀!慳B淨係食廢紙、金屬、唔同種類嘅塑膠 (包括發泡膠)、玻璃容器、慳電膽/光管、充電池、小型電器同四電一腦嘅可回收物!若然佢食到啲唔適合回收嘅物品,佢又會嘔㗎喇!

請 按此參與「慳BB育成記」遊戲。

【餵餵慳B兼獲得綠綠賞積分!】

【餵餵慳B兼獲得綠綠賞積分!】

本鬼又又又有嘢要益大家喇~由即日至3月17日,喺「慳BB育成記」遊戲入面,會不定時咁出現3個「慳BB限定時刻」,見到記住要即刻cap低呀~大家下次去回收站回收嘅時候,只需要帶同至少1公斤嘅回收物並出示3款限定時刻嘅截圖,就可以獲得100分嘅綠綠賞積分㗎喇!

請 按此參與「慳BB育成記」遊戲。

*每人每日最多可換領積分一次。如未有綠綠賞智能積分卡,只要提交1公斤回收物及出示3款截圖,即可申請積分卡一張。

【KOL鬼鬼 In Town】

【KOL鬼鬼 In Town】

係人都知慳BB同本鬼最鐘意扮鬼扮馬,大家又估唔估到今次我哋兩個扮緊邊個呢?俾啲貼士大家呀~一個係成日拎住支結他喺街頭Busking 嘅靚聲KOL,另一個就係無論上山下海都會見佢嘅蹤影,仲會幫手清潔海岸嘅山系環保KOL!講到咁白大家都仲未估到?

想知道鬼鬼扮緊邊個,呢幾日留意本鬼嘅FB同IG就會有答案㗎喇!

【Judas & Hidy同你分享環保習慣】

【Judas & Hidy同你分享環保習慣】

開估喇!開估喇!慳BB同鬼鬼係扮緊 Judas Law 同埋 Hidy Yu 余曉彤呀。似呀呢~都話我哋兩個扮乜似乜㗎啦。講返正題先!之前環保回收達人Hidy就喺街頭做咗個訪問,問吓大家日常嘅回收做法。而Judas就分享咗佢Busking嘅時候,觀察到大家嘅一啲壞習慣。唔劇透咁多喇~即刻去片!

請按此瀏覽影片。

【回收膠樽話咁易】

【回收膠樽話咁易】

唔知大家有無喺街見到部有鬼鬼靚樣嘅機呢?嗰部就係回收飲品膠樽嘅「入樽機」喇!大家以後見到佢就可以拎啲飲完嘅飲品膠樽去回收,仲會有即時回贈𠻹㗎~

千祈千祈千祈!記得記得記得!乾淨回收但唔好撕走膠樽上嘅招紙,保留樽蓋同Keep住樽身唔好變形呀!

今年第1季會有60部入樽機喺港九新界唔同地方陸續投入服務,想知邊度有入樽機?即睇:www.hkrvm.com.hk

想知入樽機點運作? 去片:www.hkrvm.com.hk/hk/usage

【永不放棄鬼鬼】

【永不放棄鬼鬼】

「我係鬼鬼,係個永不放棄嘅鬼。」

鬼鬼從來都係一個好堅持嘅鬼。講到環保,本鬼更加係!為咗推動更多人飲完嘢回收返個膠樽,環保署全新嘅「入樽機」已經面世喇~透過入樽機交回飲完嘅飲品膠樽可獲得即時回贈 ,並確保呢啲膠樽都會運到合適嘅回收商,喺本地妥善處理及回收𠻹!

記住!要保留返樽身嘅招紙、樽蓋同埋Keep住樽身唔好變形,部機先會認得你個樽㗎!

【慳BB 進~化~!】

【慳BB 進~化~!】

慳BB都識進化?無錯!全靠大家嘅努力,慳BB已經成功進化咗喇!即刻Click下面條link睇吓進化咗嘅慳BB係點樣㗎喇!繼續去餵佢啦~慳BB嘅成長就靠你哋喇!!

請按此參與「慳BB育成記」遊戲。

【回收膠樽 大家咁話!】

【回收膠樽 大家咁話!】

作為鬼鬼嘅忠粉,應該都知道環保署已經喺唔同嘅地區推出咗「入樽機」啦!(自認鬼粉嘅唔准話唔知呀)希望「入樽機」嘅出現,令大家回收飲品膠樽可以更方便。

講多樣嘢畀大家知~其實入樽機係將來推行嘅塑膠飲料容器生產者責任計劃嘅其中一部份嚟㗎,以妥善及有效管理廢塑膠飲料容器!為期三個月嘅公眾諮詢已經開始咗,大家有咩意見就記得要去提出啦~

為咗保護環境,大家一齊承擔回收飲品膠樽呢個責任啦!

入樽機詳情: https://www.hkrvm.com.hk/hk/

「塑膠飲料容器生產者責任計劃」,今日起諮詢期三個月,至到5月21號。請按此瀏覽更多詳情。

【一餵一十卜喔】

【一餵一十卜喔】

鬼鬼好努力咁頂到頭都痛埋,都係希望可以增加回收數量,餵飽慳B咋!見到鬼鬼咁辛苦,不如大家都一齊幫幫手啦!不過大家就唔使好似鬼鬼咁辛苦嘅~只要將合適嘅回收物餵俾慳BB就ok㗎啦!平日大家咁十卜(Support)鬼鬼,今次都一定會幫手嘅~係咪?

請按此參與「慳BB育成記」遊戲。

【Gwai Gwai says I love you】

【Gwai Gwai says I love you】

沙朗嘿唷~大家見到咁靚仔嘅鬼鬼都實會想珍藏我嘅閃卡㗎喇!
實體卡呢就暫時未有喇~想儲特別造型嘅鬼鬼同慳B就去「慳B Game」入面留意住3個不定時出現嘅「限定時刻」啦!仲有呀~Cap齊哂3款截圖再帶同至少1公斤嘅回收物去回收站,仲可以獲得100分嘅綠綠賞積分𠻹呀!

請按此參與「慳BB育成記」遊戲。

*如果未有綠綠賞智能積分卡,只要提交1公斤嘅回收物同出示3 款限定時刻截圖,即刻可以申請積分卡一張。

【慳BB育成記 倒數最後4日喇!】

【慳BB育成記 倒數最後4日喇!】

話咁快慳BB育成Game就嚟到尾聲喇~仲未玩過嘅快啲去玩啦!大家記得趁最後幾日,一齊挑戰餵飽慳BB,亦都要留意唔好亂餵嘢俾慳B食同埋Cap底限定時刻(特別係本鬼嘅型仔樣)換分呀!

請按此參與「慳BB育成記」遊戲。

【壓縮啦!膠樽!】

【壓縮啦!膠樽!】

唔通鬼鬼偷偷哋喺「入樽機」入面做嘢又話你知咩~

講笑啫~唔通真係靠本鬼逐個碌咩,想攰死鬼鬼呀!新嘅「入樽機」好high-tech㗎~除咗具備掃描功能,用嚟識別容器上嘅條碼,確保接收嘅都係飲品膠樽之外,仲有壓縮功能,可以減少膠樽嘅體積,咁就可以提高入樽機嘅處理同儲存量啦!

樽蓋同招紙都唔駛搣走,因為回收廠會識得用機器打碎同分類架喇!最緊要乾淨!

【智能回收箱 方便又好用!】

【智能回收箱 方便又好用!】

好消息!!而家喺「綠在東區」、「綠在大角咀」同埋「綠在屯門」都分別設置咗智能回收箱!佢識自動測量、記錄回收物重量同自動儲存回收獎賞積分𠻹㗎~大家快啲去試用呢啲智能回收箱做回收啦!

【下次繼續嚟綠在區區回收】

【下次繼續嚟綠在區區回收】

「各位綠在區區嘅鬼鬼迷,係咪玩得好開心呢?記得攞齊你哋嘅隨身物品,下次再嚟綠在區區回收呀!」

綠在區區有得回收又有得儲分,積分仲可以換禮品𠻹呀!你話呀~點可以唔Keep住再嚟喎!

請按此瀏覽各區「綠在區區」地址。

【充電池回血術】

【充電池回血術】

唔知大家有冇聽過一個都市傳說,當充電池冇電嘅時候,只要拍吓佢就可以將佢僅餘嘅電逼出嚟呢?本着求真精神嘅鬼鬼,聽完即刻就試咗,拍到手都軟呀,不過效果好似麻麻囉.....仲要俾慳B追住我嚟咬𠻹~

聽鬼鬼講,與其拍到手都痛,不如好好地拎舊電去回收,快啲俾個機會佢重生好過啦~

【我哋係慳BB!】

【我哋係慳BB!】

無論問咩問題,慳B都係應你一個字「慳~」,就等鬼鬼幫大家翻譯啦!
「我哋係邊個?」「慳BB!」
「最鐘意做咩?」「食回收物!」
「最叻係做啲咩?」「轉廢為材!」
唔知慳BB幾時先可以學識講嘢,等本鬼唔使再做翻譯呢.....

【無限包裝包裝包裝.....】

【無限包裝包裝包裝.....】

每逢節日鬼鬼會遇到一件好唔開心嘅事,就係收到嘅禮物都會有好多層包裝,拆極都拆唔完......

其實節日氣氛嘅嘢又唔一定要用包裝堆砌嘅!下次送禮物俾朋友嗰陣,不妨試吓走包裝,收到嘅人都一樣開心啫~~

【慳BB新色出現!!】

【慳BB新色出現!!】

有日鬼鬼帶慳B去O · PARK 1 參觀廚餘回收廠,點知意外發現大食慳BB係連廚餘都啱食,仲變咗身做紫色𠻹!想知個過程係點,即刻去片睇吓!

【五星級慳B】

【五星級慳B】

自從慳B發現自己鐘意食廚餘之後,就成日捉住鬼鬼要本鬼煮嘢食......

成日要我煮,都係想我俾啲菜頭菜尾佢食咋嘛!不過見佢食得咁開心,將廚餘轉化為生物氣用嚟發電,仲可以成為堆肥,就唔同佢計啦!

【我唔係垃圾桶!】

【我唔係垃圾桶!】

有啲嘢唔夾就係唔夾,唔可以放埋一齊㗎!

垃圾桶還垃圾桶,回收桶還回收桶,兩樣嘢嚟嘅,唔好撈埋一齊講呀吓!環保署已經推出咗新設計嘅路邊回收桶,上面仲有QR Code,如果個桶滿咗就可以即刻通報承辦商跟進,回收就更方便啦。

如果你哋有可回收嘅紙張、膠樽同埋金屬就記得拎去回收桶乾淨回收啦!

【回收守門員】

【回收守門員】

我擋!再擋!邊個再亂拋就冇面俾呀!

你就話貪方便將垃圾拋落回收桶,但啲垃圾有可能會污染咗成桶回收物㗎!聽阿鬼講,垃圾就放垃圾桶,唔好搞亂。我冇分身都冇三頭六臂擋㗎!

【回收充電池要識揀】

【回收充電池要識揀】

慳BB成日心思思想偷食充電池,其實又使乜偷食喎~等本鬼我陪佢一齊揀啱佢食嘅充電池咪得囉~放心!為咗慳B嘅身心健康,本鬼一定會金睛火眼咁過濾,唔會俾慳BB亂咁食即棄電池!

【養樽千日 用在一時】

【養樽千日 用在一時】

正所謂養樽千日用在一時...... 鬼鬼我就係怕慳BB餓,平日先儲埋咁多樽咋。

你睇下佢隻嘢幾猴擒!冷靜啲先~慢慢食啦!

【環保得,做公益亦得,得咗!】

【環保得,做公益亦得,得咗!】

「入樽機」都推出咗一排啦,大家除咗知道佢可以回收飲品膠樽兼有回贈之外,仲知唔知其實佢仲有個好有意義嘅技能呢?

你可能留意到。無錯!佢有得將回贈金額捐俾香港公益金、香港童軍總會或香港女童軍總會呢3間慈善機構㗎~環保得嚟又可以做善事,大家冇理由唔支持啩~

【看慳BB 72變!】

【看慳BB 72變!】

食完回收物變唔同顏色就話好睇啫,食咗唔乾淨嘅回收物,搞到慳BB變到魔鬼咁款又惡又有角又何必呢?佢一心只係想食啲乾淨嘅回收物咋,你哋唔好再逼佢喇!

【你有冇常識㗎!食未洗過嘅回收物!】

【你有冇常識㗎!食未洗過嘅回收物!】

哎哋!心急到你呀!咪一路洗緊囉,等一等先啦!

唉。。。鬼鬼我得一對手邊洗得咁快喎!!如果大家有乖乖咁將回收物洗乾淨先拎去回收,本鬼就唔使一個人洗得咁辛苦啦!

【世上只有媽媽好】

【世上只有媽媽好】

喂呀~點解冇人提本鬼聽日係母親節呀!大件事喇今次!!

任何人都可以得罪,但得罪母親大人分分鐘連飯都冇得食!唔講咁多喇,快快手搵吓屋企有咩嘢啱做鬼媽嘅母親節禮物先!

【慳BB轉身變】

【慳BB轉身變】

慳BB食完回收物會變色再轉廢為材就大家都知啦~(話唔知嘅返去由頭追post一次)但究竟佢係點樣變身㗎呢?!即刻去片,成個變身過程將會赤裸裸咁呈現俾大家睇!

【我要訓練你成為最強嘅慳B!】

【我要訓練你成為最強嘅慳B!】

做得本鬼身邊嘅慳B,又點可以淨係識轉廢為材一個技能㗎(雖然呢個技能已經好叻),要一直進步㗎嘛~鬼鬼我成日都會同佢做好多訓練,務求令佢成為最強嘅慳B!不過其實本鬼最想嘅就係慳BB可以快啲學識講嘢,唔使吓吓都估佢想點~

【做好回收 鬼鬼愛你520】

【做好回收 鬼鬼愛你520】

「Da加天禾講,宜古Da家助巧回收,鬼師傅禾做最艾Ne~ 520 艾Ne喲」

(譯:大家聽我講,如果大家做好回收,鬼師傅我就最愛你~ 520愛你喔)

【嚇到本鬼個心離一離呀】

【嚇到本鬼個心離一離呀】

早幾日鬼鬼見到為食慳B好似想食咗個開住嘅風扇,嚇到我9秒9跑去抆插頭,驚電死佢!雖然風扇呢類小型電器可以回收啱佢食啫,但都唔係著住咁食㗎嘛!!好彩佢只係貪玩嚇我啫~

【綠綠賞10公斤挑戰 最後倒數!】

【綠綠賞10公斤挑戰 最後倒數!】

注意!綠綠賞10公斤挑戰得返幾日咋!

大家儲夠10公斤回收物拎去綠在區區回收未呀?未嘅就快啲執吓屋搵下有冇嘢可以拎去回收啦~

活動詳情:
5月31號或之前,提交累積不少於10公斤指定回收物(當中不少於1公斤廢塑膠、玻璃容器或小家電)到各個綠在區區「回收環保站」、「回收便利點」同埋「回收流動點」,就有額外500分嘅 《綠綠賞》積分;而如果累積到50公斤回收物,更有2000分𠻹!

【入樽機回收膠樽最方便~】

【入樽機回收膠樽最方便~】

自從有咗「入樽機」之後,回收膠樽就簡單咗好多,仲邊使又撕走招紙又要拎走個樽蓋咁麻煩喎,就咁成個樽放入去「入樽機」咪得囉!不過都記得回收前要清洗乾淨呀,乾淨回收呢啲基本嘢大家都知㗎啦~吓話~

想知邊度有入樽機?睇呢度啦: https://bit.ly/3u1oquT

【食咁多,小心食滯呀!】

【食咁多,小心食滯呀!】

鬼鬼我成日都執執埋埋好多回收物返屋企,食到慳BB肚Dum大大~(雖然好Cute,不過都驚佢會食滯㗎嘛~)如果大家乖乖地做好源頭減廢,本鬼冇得執咁多回收物返屋企,就唔駛係咁餵慳B食嘢啦~

【回收行星】

【回收行星】

本鬼知道,就算我用呢個回收行星彈你,你都唔會嬲,因為你唔只係鬼鬼嘅朋友,仲會..........食咗佢!

【玩得慳點】

【玩得慳點】

慳B~ I'm loving you all day

其實儀式感嘅嘢,用回收物DIY都一樣得啫!你哋睇吓本鬼佈置得幾靚~

【喺一個大雨嘅晚上......】

【喺一個大雨嘅晚上......】

一條濕滑嘅街道,一個神出鬼沒嘅慳B,就嚇到鬼鬼我差啲喺屋企跑咗10K

慳B呀~其實你想食咗個遮袋兼話我知落雨應該用環保遮套或者雨傘除水機啫,出聲咪得囉,唔使吓吓咁嚇人嘅!!

【一次相遇,從此多咗個慳B喺身邊】

【一次相遇,從此多咗個慳B喺身邊】

唔經唔覺,原來慳BB已經喺我身邊一年喇~由一開始意外嘅一秒眼神接觸佢就無啦啦跟我返屋企(本鬼太有吸引力大家不要妒忌),繼而發現佢仲識得轉廢為材咁叻B,鬼鬼我今日不停碌返個電話真係睇到眼濕濕呀~不過慳B到而家都仲未識講嘢,睇嚟鬼鬼我要繼續努力至得喇!

【國際野餐日】

【國際野餐日】

聽日就係國際野餐日,咩都快人一步嘅鬼鬼我梗係搶先今日就帶埋慳B去野餐先啦!嗱嗱嗱~大家唔好以為本鬼會咁唔環保又拎即棄膠樽,又汽水罐咁呀,嗰啲係專登帶俾慳B食㗎!慳B成日話鬼鬼唔帶佢出街玩,今次有嘢食又有得周圍走,滿足晒啦~

【星之吸膠大法!!!】

【星之吸膠大法!!!】

居家好幫手,星之慳BB!

唔好睇小佢呀,佢食回收物嘅速度好似打機果隻卡比咁,一吸即吞(個肚脹都唔脹,條腰肥都唔肥)!

但記得餵食前要洗乾淨呀~

【廚餘事件簿】

【廚餘事件簿】

線索!我要更多線索去搵下啲剩食喺邊度!
邊有可能一覺瞓醒就清晒碟㗎~唔通又係嗰隻衰嘢幫手?

【環保玻璃磚誕生!】

【環保玻璃磚誕生!】

有日鬼鬼我突然間見到有幾舊環保玻璃磚喺屋企出現,即刻令我諗起慳BB除咗為食之外,仲識轉廢為材,將啲玻璃樽轉化做玻璃磚~慳B真係愈嚟愈叻豬!

【環保小神童】

【環保小神童】

喂呀慳B呀!唔好一見到回收物就即刻要食咗佢得唔得呀~

雖然你識轉廢為材啫,但係佢唔係一個普通嘅紙盒嚟㗎,係我最好嘅朋友呀!

【橡膠同矽膠唔可以亂食㗎!】

【橡膠同矽膠唔可以亂食㗎!】

雖然心心眼嘅慳B係好可愛,但鬼鬼我都唔會心軟俾你亂食嘢㗎,就好似橡膠同矽膠呢兩種膠你都唔食得,一陣食完又肚仔痛喇。乖乖地啦慳B,食返啲啱你食嘅回收物啦~

【慳BB與非塑膠即棄餐具工廠】

【慳BB與非塑膠即棄餐具工廠】

「收集,再造,生產!登登登凳~非塑膠即棄餐具就係咁樣誕生出嚟㗎喇!」

分解塑膠往往要成幾百年,雖然可以回收即棄膠餐具,但最好當然係用番可重用餐具啦。如果真係要用即棄餐具,不如用由紙、竹、米漿等等製造嘅非塑膠即棄餐具啦,就可以減少對環境嘅負擔喇。大家都睇到鬼鬼我幾努力喺度整㗎(慳B都好勤力咁督促我)唔好嘥我哋心機,大家都試吓開始用啦!

【慳B出浴照】

【慳B出浴照】

呢個膠樽對慳BB嚟講,雖然最終會變成佢嘅嘢食,但呢一刻係佢嘅沖涼小鴨鴨~

鬼鬼我都要努力收集多啲唔同類型嘅回收物,整多啲玩具陪吓佢先~用完玩完先再轉廢為材。

【Paper Gear Solid】

【Paper Gear Solid】

你以為你咁樣就可以逃出本鬼嘅法眼咩~鬼鬼我一眼就睇得出喇!仲睇到你用嚟匿埋嗰個紙箱冇撕到膠紙𠻹呀,等我幫你撕走佢再拎去回收啦~

【有邊啲先算係即棄膠餐具?】

【有邊啲先算係即棄膠餐具?】

環保補完計劃即將啟動!同大家腦補一下先,除咗一般大家都認知嘅膠杯、膠食物容器同發泡膠餐具之外,其實仲有其他例如飲管、攪拌棒、杯蓋同食物容器蓋都將會包含喺諮詢計劃後實行嘅範圍入面㗎~

有咩意見記得喺9月8日或之前去 www.rdpt.hk 提交呀~

【鬼鬼人魚公主】

【鬼鬼人魚公主】

「係邊個!邊個打擾我唱歌嘅雅興!!」

本來鬼鬼公主我好開心喺度唱緊歌,突然間見到有啲金光閃閃嘅嘢,鬼鬼我以為有寶物啦~點知原來係啲發泡膠盒吹咗落海!膠本身就已經好難分解,碎咗嘅發泡膠粒仲會化成塑膠微粒,威脅海洋生態系統,污染我個靚靚海洋!

如果你對管制即棄膠餐具有意見,記得喺9月8日或之前去 www.rdpt.hk 發表喇~

【自製環保玩具更加有心思】

【自製環保玩具更加有心思】

話晒「慳B好與壞,在乎溝通與關懷」呀嘛,所以鬼鬼我平時收集完回收物之後,就會左揀右揀,睇吓有冇啱用嘅嘢,再絞盡腦汁咁DIY啲玩具俾慳BB陪佢玩㗎~你睇佢玩得幾開心!

【送微塑膠入鬼口?!】

【送微塑膠入鬼口?!】

點解會食魚食到成口都係膠㗎.....

鬼鬼唔係講笑㗎,喺香港常見嘅海上垃圾入面,有好多都嚟自即棄膠餐具嘅塑膠碎片同埋發泡膠碎片,廢塑膠破碎之後成為微塑膠漂入海洋。大家試諗下,如果海洋生物食咗呢啲廢塑膠,大家喺食嘅時候就有機會食埋啲膠,其實最終要承受嘅都係自己咋!

喺9月8日或之前去 www.rdpt.hk 提交意見啦

【超級為食慳B!】

【超級為食慳B!】

見到慳B係咁不停食「四電一腦」回收物,鬼鬼唯有講一句「呢個世界真係美好,啲空氣真係清新呀」嚟冷靜吓~

又邊個估到慳B,人仔細細可以食到咁多嘢得㗎~其實食唔晒唔使夾硬食㗎,等鬼鬼我打去 2676 8888 搵政府營辦商,免費上門回收啦!

【公平咩?!】

【公平咩?!】

連續咁多日睇咗咁多場熱血嘅比賽,鬼鬼嘅運動魂都忍唔住爆發出嚟喇!不過得我一個跑得咁辛苦,慳B恃住自己識飛就喺度整蠱我.....

【啊~慳咩慳咩慳!!】

【啊~慳咩慳咩慳!!】

自從鬼鬼我戴咗透視力眼鏡之後,所有即棄膠餐具都即刻俾我睇穿晒啊!!!本鬼忍唔住要出絕招喇,出嚟啦慳B!同我食晒所有膠~

不過淨係靠鬼鬼同慳BB努力回收係唔夠㗎,最好梗係從源頭入手減少使用即棄膠餐具啦!

有意見記住喺9月8日或之前去 www.rdpt.hk 提交呀!

【仲用即棄膠餐具?成個環境俾你搞軭晒!】

【仲用即棄膠餐具?成個環境俾你搞軭晒!】

記得要喺9月8日或之前去呢個網站 www.rdpt.hk 俾意見呀

【食紙啦你】

【食紙啦你】

嗱~大家睇清楚啲,鬼鬼我係叫慳BB食紙咋,唔好諗錯隔離呀!

【嗱!唔乾淨!咪會搞成咁囉!】

【嗱!唔乾淨!咪會搞成咁囉!】

話咗你㗎啦慳BB~成日趁我唔為意就偷食啲未洗乾淨嘅回收物,而家搞到魔鬼咁又惡又有角,係咪衰呢!

【反對!外賣含大量即棄膠餐具!】

【反對!外賣含大量即棄膠餐具!】

有冇計過全盛時期你一個星期會買幾多餐外賣?又有冇留意一餐外賣用咗幾多膠?等本鬼話你知,單單一個外賣,最基本已經包含咗膠袋、膠盒、膠碗、膠杯同膠餐具。餐餐都用咁多,你話個環境點搞呀?!

仲有幾日咋,記得要喺9月8日前去 www.rdpt.hk 俾意見呀

【鬼鬼仙子】

【鬼鬼仙子】

「即棄膠膠,變哇變哇變~!」

鬼鬼仙子嘅出現,就係為咗將所有即棄膠餐具變做比較環保嘅代替品!你睇吓~經過本鬼嘅變變變之後,成個環境幾美好!其實只要有心,人人都可以係鬼鬼仙子,不如大家都一齊搣甩即棄膠餐具啦!

【不要玩食物!】

【不要玩食物!】

慳BB愈大愈百厭!食就食啦,又要當吹波膠咁玩,曳曳慳B!

【我食Popcorn 慳B食「PopCon」】

【我食Popcorn 慳B食「PopCon」】

根據非正式統計,一路食住「口立濕」一路睇戲,套戲會好睇10倍(好似係)。好彩平時鬼鬼有儲埋啲細細粒又碎濕濕嘅Con盒俾慳B當「PopCon」,慳B先肯靜靜地陪我睇戲咋~

【人氣吉祥物大嘥鬼慳BB現身九龍灣!!】

【人氣吉祥物大嘥鬼慳BB現身九龍灣!!】

獨家消息!大嘥鬼同慳BB 9月18日喺德福花園出現!

實不相瞞,鬼鬼係去「綠在社區回收墟2021」活動呀,我哋會同大家一齊參加二手物交換市集、智能回收系統推廣、仲有唔同嘅遊戲攤位㗎~

【追飛機的孩子】

【追飛機的孩子】

對住咁為食嘅慳B,一隻紙飛機就可以幫到佢放電啦~仲可以餵飽佢,轉廢為能𠻹!

(其實係本鬼懶得帶佢落街)

【DIY燈籠 環保又獨特】

【DIY燈籠 環保又獨特】

燈籠嘅嘢,只要有心思再加埋一對巧手就可以整到啦,輕鬆!!大家睇吓鬼鬼DIY嘅碌柚燈籠幾高質,隻兔仔幾生動,慳B玩得幾開心~

【綠在社區回收墟2021你去咗未?】

【綠在社區回收墟2021你去咗未?】

本鬼同慳B受歡迎就出晒名㗎啦~睇吓上星期日幾多人去德福花園搵我哋!嗱~預告定俾大家知,我哋嚟緊2個月仲會去唔同地方見大家㗎!

各位鬼粉準備好未?(尖叫聲!!!)

想知嚟緊2個月會喺邊度撞到我哋?去呢度睇啦: https://bit.ly/3kAWoVT

【呀鬼走得快 鐵盒有古怪】

【呀鬼走得快 鐵盒有古怪】

哎唷!冇陰公囉!慳BB個衰dol(衰仔),偷咗禾個月餅盒呀!

係~月餅盒呢類鐵盒係可以俾慳B食嘅,但都要睇清楚入面有啲咩先,鬼鬼我收埋咗好多寶物喺入面㗎嘛~

【為食鬼 慳B】

【為食鬼 慳B】

俗語話:「嘢可以亂食,說話唔可以亂講。」

其實嘢都唔可以亂食㗎!你睇慳BB見電就食,即刻GameOver喇!

利申:唔係鬼鬼控制慳B玩㗎,係就唔會俾佢亂食汽車電池啦!

想知多啲就去下面睇吓邊度有得回收充電池啦: https://bit.ly/2XTnsGY

【Here Comes A New Challenge!】

【Here Comes A New Challenge!】

「慳B傳來挑戰~回收Challenge變變變!」

慳B:「慳慳慳慳慳慳慳慳,慳慳慳慳慳慳慳慳慳慳慳慳慳,慳慳慳慳慳慳慳慳慳慳!」

(鬼譯: 大家撳到我變咩色,你就要拎對應嘅回收物去回收,你夠唔夠膽接受挑戰先!)

【發動綠綠賞卡 召喚回收獎賞】

【發動綠綠賞卡 召喚回收獎賞】

咩話!綠綠賞卡可以召喚到獎賞禮品?等我遊戲鬼發動綠綠賞卡,用電子積分召喚唔同嘅回收獎賞先!

綠綠賞積分計劃:https://bit.ly/3F7PU8S

【ASMR】

【ASMR】

慳BB學人開Live,話要開個食膠嘅ASMR~唔怪得之前係咁問鬼鬼我拎啲塑膠回收物,仲要本鬼專登幫佢收集勁多光碟,話啲聲好聽啲喎~

【無論你點壞 慳B都愛】

【無論你點壞 慳B都愛】

之前慳BB見到有人同電飯煲簽紙結婚,佢又有樣學樣,想同屋企個壞咗嘅電飯煲結婚喎,嚇得我呀。不過鬼鬼知道佢都係貪玩啫,轉個頭咪又係一啖食咗佢~

【被選中的地方】

【被選中的地方】

鬼鬼我同慳BB喺10月23日又再出動見大家喇,你哋估吓我哋今次去邊度? (而家唔開估住,答案遲啲喺Comment Box度同大家講~)

【打機不能停,慳BB唔明……】

【打機不能停,慳BB唔明……】

話說噚晚本鬼終於有少少私人時間,第一時間打電話畀老友上網連機,快樂,無比嘅快樂……點知喺隔離嘅慳BB竟然一啖咬落個mon度!!No!個mon仲用得,唔係回收物嚟㗎!我哋差少少就贏㗎喇!!!

Any肥,請問應該紅燒定清蒸?

【我哋下星期會出現喺……】

【我哋下星期會出現喺……】

知道好多人都掛住本鬼同慳BB~我哋嚟緊會繼續落區見吓大家!
10月30日喺沙田第一城同荃灣中心、10月31日喺灣仔利東街,都會有「綠在社區回收墟2021」活動,記住嚟睇吓智能回收系統嘅推廣同體驗,仲有工作坊及各種攤位遊戲,同埋最重要嘅——本鬼同慳BB!

之後仲會去邊?去呢度睇啦:https://bit.ly/3kAWoVT

【如……入樽機伴我】

【如……入樽機伴我】

「乜咁啱嘅...」

又有邊個估到,原來入樽機除咗可以回收飲品膠樽兼有回贈之外,仲可以製造偶遇機會㗎啫~

【期間限定 ‧ 粉絲聚會回憶「綠」】

【期間限定 ‧ 粉絲聚會回憶「綠」】

本鬼前幾日同慳BB去咗黃埔花園,參加綠在社區回收墟2021,又體會到「被」追星嘅感覺喇!慳BB,快啲畀佢哋睇吓本鬼嗰日嘅風采……同埋熱情嘅鬼粉啦!

預告吓我哋今日會去沙田第一城同荃灣中心,聽日會喺灣仔利東街同大家見面!嚟緊11月,仲可以去呢啲地方搵我哋喎~https://bit.ly/3kAWoVT

【回收墟回憶「綠」】

【回收墟回憶「綠」】

沙田嘅鬼B粉!荃灣嘅鬼B粉! 灣仔嘅鬼B粉! 感謝咁多位鬼B粉呢兩日嚟參加活動!

我同慳B已經好掛住大家,唯有睇吓影咗嘅回憶「綠」嚟撫慰下我嘅相思之情啦~

不過唔緊要!嚟緊三星期又可以去見新朋友啦!
11月6日就去見新蒲崗采頤花園嘅朋友啦;
11月7日就去旺角海富苑啦...

由於本鬼太興奮,咁講落去會沒完沒了所以,大家可以click下面跟貼啲我哋嘅行程:https://bit.ly/3kAWoVT

【山系慳 BB 亂食就 GG】

【山系慳 BB 亂食就 GG】

秋高氣爽,本鬼心情舒暢,諗住帶慳 BB 去行吓山,點知行咗幾步,慳 BB 對沿途嘅「美食」流晒口水…

本鬼淨係要阻止慳 BB 食啲唔乾淨嘅回收物就已經心很累,都唔知仲有冇力行返落山…

大家行山嗰時記得盡量用可重用嘅器皿,同埋帶走自己嘅垃圾落山,分類好之後再乾淨回收,知道無?

【瘋狂紅菜B】

【瘋狂紅菜B】

慳B呢排唔知受到啲咩刺激突然間攞個紅菜頭嘅根放係個頭頂...

吼!哈哈哈!吼!

廚餘用得唔好嘥!不過,其實萬聖節過咗好耐喇……

"𝔽𝕚𝕟𝕕𝕚𝕟𝕘 𝔾𝕣𝕖𝕖𝕟𝕪"

"𝔽𝕚𝕟𝕕𝕚𝕟𝕘 𝔾𝕣𝕖𝕖𝕟𝕪"

你哋有冇見過慳BB?

我見呢排啲紅葉開得咁靚,就諗住帶慳BB嚟浪漫吓啦,但行行下唔見咗佢。

眼望都係一片片嘅紅色,連慳B個影都唔見。。。等等。。。唔通!?

慳BB你原來將啲回收物收埋咗喺呢度!

【#環保習慣咁簡單 預告狀!】

【#環保習慣咁簡單 預告狀!】

最新消息!!!

鬼鬼我就向 Jerry.C 謝利 同 SMITH 陳俊藝 發出咗挑戰!要佢哋喺嚟緊 7 日養成唔同嘅環保小習慣。

話畀大家知要養成環保習慣其實真係唔難,我仲搵咗一向環保嘅 MelodyCheng 畀啲意見佢哋!大家記得要留意佢哋嘅 FACEBOOK 同IG,睇下佢哋挑戰成唔成功啦!

【#環保習慣咁簡單 Challenge Starts - Day 1】

【#環保習慣咁簡單 Challenge Starts - Day 1】

七日嘅環保 Challenge 今日開始喇!Well~ Day 1就簡單啲~ 喺屋企搵下有無啲可以回收嘅嘢。咁簡單?!嗱... 未講完!係要搵一啲三色回收物以外又可以拎去回收嘅嘢。事不宜遲,一齊睇吓 SMITH 陳俊藝 同 Jerry.C 謝利 做成點?環保達人 MelodyCheng 有啲咩貼士畀佢哋呢?

【#環保習慣咁簡單 Challenge Day 2】

【#環保習慣咁簡單 Challenge Day 2】

嚟到 Day 2!呀鬼我就約咗 SMITH 陳俊藝 同 Jerry.C 謝利 去一個神秘地方!可以幫手處理噚日搵出嚟嘅回收物。呢個地方佢哋兩個都係第一次嚟。即睇佢哋有咩反應啦~ MelodyCheng

【#環保習慣咁簡單 Challenge Day 3】

【#環保習慣咁簡單 Challenge Day 3】

進入到 Day 3,今日就畀個機會 SMITH 陳俊藝 同 Jerry.C 謝利 問吓環保達人 MelodyCheng 點喺日常生活上減塑!呀鬼畀大家嘅小tips就係,由自備餐具開始,逐步逐步減塑。唔知Melody又有咩小貼士呢?

【#環保習慣咁簡單 Challenge Day 4】

【#環保習慣咁簡單 Challenge Day 4】

個 Challenge 都進行到一半!估吓今日會做咩?今日返去之前回收嘅地方「綠在區區」回收便利點,Check 吓 SMITH 陳俊藝 同 Jerry.C 謝利 keep 唔 keep 到回收習慣!睇吓有無認真對待呀鬼我畀嘅挑戰先~ MelodyCheng

順便提提大家可以去「綠在區區」回收,可以用綠綠賞積分卡儲分換禮品!

綠綠賞積分計劃:https://bit.ly/3F7PU8S

【今季興咩PANTONE?】

【今季興咩PANTONE?】

介紹返!唔止係今季,而係四季都咁潮嘅PANTONE!

Classic Greeny 經典慳B綠
Plastic Brown 啡塑膠
Oldspaper Blue 舊紙藏青
Metallic Yellow 罐屬黃
Fragile Green 碎透綠
Electric Red 電力紅
Brickputer Red 四電一磚紅
Shiningless Red 紅光不再
Broken Rogue 壞掉紅
Food Purple 廚芳紫

你跟我哋一出世就咁時尚嘅慳B學到未?

【#環保習慣咁簡單 Challenge Day 5】

【#環保習慣咁簡單 Challenge Day 5】

終於去到 Challenge 嘅最後大直路!考題 for today is… 環保署嘅入樽機係點樣用!入樽機嚟緊會由 60 部倍增加至 120 部,總有一部喺左近,今日睇吓 SMITH 陳俊藝 同 Jerry.C 謝利 識唔識用先! MelodyCheng

【記得睇字】

【記得睇字】

其實個「6」字係代表乜嘢啊?

喂!唔係啊喂~ 等陣先,唔好講玩笑喇,大家講講,呢個係咩嚟先,有無人話到畀鬼姨知呢個係咩嚟先,唔係,冷靜啲先~

聖誕包禮物,實多紙箱㗎!鬼粉識得源頭減廢啫,唔代表人哋都識㗎,咁多紙箱攞去邊好先?攞去個「6」度攞!認住個「6」字,綠在區區真係幾乎區區都有一間,開埋張「綠綠賞」智能積分卡,回收完又可以儲積分換襟針啊貼紙啊咁,有重量有希望啊呢單嘢,回收物跟重量去計分嘅,玩吓手揸住 6,000 幾分,證明自己夠晒環保,到時鬼鬼真係「服」過土茯苓咁同你講聲佩服佩服~

綠綠賞積分計劃:https://bit.ly/3F7PU8S

【Dr. 鬼 - OPERATION L.E.T. T.E.R.】

【Dr. 鬼 - OPERATION L.E.T. T.E.R.】

鬼醫生! 收到罕見嘅實體L.E. T .T.E.R.,需要立即進行緊急手術!

OPERATION L.E. T .T .E.R.
鬼醫生: 手術刀
慳護士: 慳!
鬼醫生: 鉗
慳護士: 慳慳!
(慳護士... 緊張. ..幫鬼醫生抹抹汗先)

鬼醫生: 分離成功,OPERATION Success. L.E. E.R 成功重獲 。。。!
慳護士你可唔可以等我講埋句台詞先食。。。
難得Cosplay扮醫生。。。

記得分開唔同物料先攞去回收呀!

【#環保習慣咁簡單 Challenge Day 6】

【#環保習慣咁簡單 Challenge Day 6】

唔經唔覺就嚟到挑戰嘅第6日!前幾日嘅題目都主要講「回收」同「減廢」,今日就轉一轉新方向 → “Reuse” 物盡其用。SMITH 陳俊藝 同 Jerry.C 謝利 要發揮佢哋嘅創意,將廢物 Level Up 繼續使用。即睇佢地有咩 Idea! MelodyCheng

【#環保習慣咁簡單 Day 7 – Last Day!】

【#環保習慣咁簡單 Day 7 – Last Day!】

Finally, 終於嚟到最後一日!經過呀鬼我6日密集式訓練,SMITH 陳俊藝 同 Jerry.C 謝利 都學識咗唔同嘅環保技巧。今日就聽聽佢哋覺得呢個挑戰究竟有無難度啦! MelodyCheng 即刻去片!

【回收大步走 桌上遊戲】

【回收大步走 桌上遊戲】

本鬼終於都出名到出遊戲!
一直人氣高企嘅本鬼一啲都唔意外~

呢個Board Game有唔同類型嘅環保問題考考你,簡單又好玩,啱晒一家人一齊quality time 啦!

換咗「基本版」之後,記住換埋「加強版」,入面有成80張問答卡,有冇環保高手敢嚟挑戰本鬼?

無論係咩版本都有本鬼同慳BB嘅超閃閃卡,鬼粉們B粉們唔係唔儲嘛?!

由今日起喺綠在區區有得換喇!即刻去片睇吓開箱片段!

【遊戲大魔王的魔笑】

【遊戲大魔王的魔笑】

作為「大嘥王」,本鬼除咗大嘥,其實玩Game都無人係我對手。
雖然慳BB你係可愛咗D,識得食回收物變色,可以轉廢為能。。。
雖然見越來越多人鍾意你,我開始有少少危機感,即刻日日去進修各種減廢回收嘅知識。。。
所以!今次我係唔會再輸比你㗎喇!
我認真起嚟真係無咩人可以贏到我。
大家快啲去換嚟挑戰我啦!

【誰是綠在區區一日之店長?】

【誰是綠在區區一日之店長?】

鬼鬼同慳BB好興奮呀!
我哋請到好犀利嘅宇宙 STAR 去綠在區區做一日店長!
吓?係睇在我鬼鬼咁靚仔嘅份上先接?
個STAR係做咩架?俾啲貼士大家啦~

佢身兼幾職、靚人靚聲、 舞技冇得輸、智慧嘅化身、正能量嘅代表...

究竟係邊個呀? 大家估吓?
我哋會喺星期四開估!

【咁正咁大件事都無人講? 一日店長-阿正!】

【咁正咁大件事都無人講? 一日店長-阿正!】

隆重開估!呢位身兼幾職、靚人靚聲、 舞技冇得輸、智慧嘅化身、正能量嘅代表就係
叱咤903人氣DJ- 阿正 Ahjeng !

12月4日 15:30阿正將會空降 綠在元朗墟 Yuen Long Hui Recycling Store,同大家互動,體驗回收嘅真諦
總之就一個字 -『正』啊!

咁正咁大件事,你哋唔係唔嚟呀嘛?
溫馨提示入場條件係攞回收物嚟回收嘅環保人士

【「綠在區區」 一日店長 阿正 】

【「綠在區區」 一日店長 阿正 】

感謝咁多熱心街坊響應一日店長嘅活動!

回顧本鬼委派去「綠在區區」嘅一日店長阿正 Ahjeng ,真係非常之合格。 細心不特止,又識得分類、乾淨回收,仲記得提醒大家開綠綠賞積分卡儲積分換日用品等等,簡直係持家有道。

最最最重要嘅係佢心目中嘅理想對象係愛環保又愛回收嘅本鬼 ,相當之識貨。 咁稱職嘅一日店長,真係想佢長駐喺度,一齊培養下感情。

快啲睇片,跟住阿正學嘢啦!你哋嚟回收嘅話,記住 tag 本鬼同埋阿正,再 #環保正正子 話俾我哋知喇!

2022年

【「惜」食至係真正食家!】

【「惜」食至係真正食家!】

個個Foodie都話自己識食,但有幾多個真係好似本鬼咁「惜」食啊?叫到成枱都係嘢食,用嚟打卡呃Like,樣樣試一啖就算,咁係嘥嘢唔係share嘢呀!

識食之餘,仲要「惜」食!等本鬼教吓你「食物斷離捨」啦。

斷:斷絕對食物有過多嘅慾望,食得晒先好嗌!

離:離開餐枱前,要食晒啲嘢!

捨:捨棄垃圾前先分開廚餘,收集到嘅廚餘會喺O.PARK轉廢為能

簡單三小步,本鬼做得到,你都做得到!

【廚餘並不渣?】

【廚餘並不渣?】

聽到「渣男」、「渣女」就走夾唔唞?咪住~

絕對唔係你諗嗰樣嘢,其實本鬼講緊嘅「渣」係「食物殘渣」咋~

正確嚟講嗰啲叫做廚餘——例如果皮、果核、魚骨、湯渣等呢啲喺煮食過程同食用後產生嘅有機廢棄置物。廚餘喺O · PARK1經過厭氧分解就可以轉化為生物氣發電同埋堆肥,轉廢為能!

「食物殘渣」今次真係勁過「渣渣輝」

想知多啲轉廢為能嘅過程,可以Click呢度睇睇啦~

【食餐飯就睇穿你?】

【食餐飯就睇穿你?】

有人話,餐枱上最容易睇得出一個人嘅真實性格,唔信?

一齊嚟同本鬼玩呢個心理測驗啦!

「你喺茶餐廳見到個好吸引嘅常餐,想嗌又覺得自己一個食唔晒,你會點做呢?」

A. 照嗌!食唔晒先算
B. 多士走牛油、嘢飲唔落糖
C. 照嗌!但少麵或走多士
D. 食唔晒就拎走

留言話畀本鬼知準唔準~

【那些「渣滓」教會我們的事 #咖啡篇】

【那些「渣滓」教會我們的事 #咖啡篇】

人生就好似飲咖啡咁,要識嘆,仲要「惜」飲。作為一個咖啡迷,本鬼每朝都要嘆返杯咖啡。嗯~咁至係人生~

正所謂用得唔好嘥,每飲完一杯咖啡,本鬼都會好好愛惜剩低嘅咖啡渣,拎嚟當做鞋櫃嘅除濕除臭劑同驅蚊劑又得,當成植物嘅天然肥料亦得,真係好鬼萬用㗎。

咪話我唔教精你,其實本鬼嘅body之所以咁光滑,都係用咗咖啡渣嚟做磨砂咋!今日教咗你哋咁多,係時候要自己發掘更多廚餘渣滓嘅用途喇~

【次次BBQ都預多咗 唔通佢仲未了解我?】

【次次BBQ都預多咗 唔通佢仲未了解我?】

呢個天氣最啱就係BBQ!「買嘢食唔駛計住計住啦!我哋咁多人,一定食得晒㗎!」

咪住先~本鬼就係要同你計到盡!買BBQ食材,又要量多又要款多,你自己話,有邊次係食得晒?豐盛BBQ隨時變「瘋剩」BBQ啊!

BBQ嘅精髓係成班人圍埋吹吓水增進感情,應承本鬼由今日起,了解朋友由胃容量開始!~認真諗吓大家嘅食量,確保食得晒先好買,咁咪顯得你窩心又細心囉~

【大嘥鬼挑戰你,食物清碟大行動!】

【大嘥鬼挑戰你,食物清碟大行動!】

識打卡,梗係食晒先打卡!有咩比食晒啲嘢更加滿足呢?

如果你都想同本鬼一樣,同大家share你嘅清碟戰績,咁就要參加由本鬼發起嘅「 食物清碟大行動」喇~

遊戲玩法好簡單~
第一步:清碟後拎起隻碟影張合照,然後放上Facebook或Instagram,叫埋班friend一齊影仲正!

第二步:加埋 #食物斷離捨 或 #FoodMinimalism,再tag @big_waster_hk & @ecc1990 同 3 位朋友一齊參加挑戰。

跟住以上玩法成功出post即可計算一次挑戰次數,記得記得記得將帳號設定為公開,累積參加次數愈多,愈有機會贏獎賞!

獎品:
1. 每位參加者都有機會獲得有機資源回收中心「O · PARK1」嘅有機肥料或鬼鬼8GB USB 乙份。(隨機送出,數量有限,送完即止)

2. 喺挑戰活動期間,參加次數最多嘅100位參加者,鬼鬼會為你度身訂做大嘥鬼Style頭像乙個,令你化身「食物斷離捨KOL」!

升級玩法:
參加者只要成功挑戰一次,再喺呢個post留言,分享一個 「食物斷離捨」嘅小貼士,本鬼就會喺留言入面選出最有創意嘅30位參加者,參加「大嘥鬼旅行團」,同本鬼實地考察有機資源回收中心「O · PARK1」!~

本鬼正式向你哋宣戰,睇吓邊個可以動搖到我清碟界一哥嘅地位喇!

活動日期:2022年11月14日至12月11日

其他條款及細則可參閱: https://bit.ly/3fNaJyT

【「嗌嗌嗌」不完?】

【「嗌嗌嗌」不完?】

對你「嗌嗌嗌」不完~

見你喺度「嗌嗌嗌」不完,本鬼就真係「唉唉唉」不停。明明嘢食都未到,又未知食唔食得晒,就keep住「嗌嗌嗌」,你都唔想同本鬼個body一樣「眼闊肚窄」㗎!

不如試吓食晒一轉,覺得唔夠先再嗌,咁就唔駛嘥嘢喇~記住「食得晒先好嗌」啊!

【做人最緊要愛「材」如命】

【做人最緊要愛「材」如命】

你以為本鬼只係惜食咁簡單?其實本鬼仲有一個特質,就係愛「材」如命~

唔好咁緊張,本鬼係愛(食)材唔係愛(錢)財啊~出得廳堂嘅美食當然要好好珍惜,但係廚房用剩嘅菜頭菜尾都要好好利用~除咗魚頭魚骨可以拎嚟煲湯之外,剩飯剩菜都可以整成炒飯㗎。

你哋都要好好對待廚房嘅「材」物,每樣食材都唔好浪費啊!

【鬼鬼高調現身】

【鬼鬼高調現身】

嘩,隻碟真係清到乾乾淨淨~大家清碟咁鬼叻,本鬼梗係要露個面,答謝大家嘅支持啦!

參加食物清碟大行動嘅時候,只要打開本鬼同慳BB嘅Filter,喺螢幕上用手指將我哋個樣移動到空碟上面(細力啲啊!),再撳掣影相,你就可以影到一張印有本鬼同慳BB靚仔樣嘅清碟合照喇。

隻碟越乾淨,本鬼嘅膚色就越白淨。想望清啲本鬼嘅真面目,就要靠你哋食晒啲嘢喇~

大嘥鬼同慳BB嘅Filter傳送門~
FB: http://bit.ly/3UUc06E
IG: http://bit.ly/3XfEaKE

【輕輕的你走了~】

【輕輕的你走了~】

輕輕的你走了,正如你輕輕的叫(叫咗超多碟餸又唔預份量);你輕輕的招手,作別一枱的食物~

呢首詩,係本鬼為你而作嘅......因為本鬼留意咗你好耐,你憂鬱嘅眼神,神乎奇技嘅嗌餸方式,同埋叫到成枱都係嘅餸菜......原來你每次食剩咁多嘢都會輕輕地一走了之!

溫馨提示,出街食飯要諗一諗嗌餸份量,識食之餘都要「惜」嗌!食得晒就可以參加由本鬼發起嘅「食物清碟大行動」喇~仲可以用埋專屬filter影低你「清碟」嘅證明㖭!

「食物清碟大行動」詳情: http://bit.ly/3UOrgkO

大嘥鬼同慳BB嘅 filter傳送門:
FB: http://bit.ly/3UUc06E
IG: http://bit.ly/3XfEaKE

【施主,莫貪心】

【施主,莫貪心】

拍拖最怕另一半花心,本鬼就最怕你哋衰貪心!

見到個餐牌咁吸引,呢樣想試,嗰樣又想試,叫到一枱都係,就最啱打卡喇。吓?! 打完卡啲野食就揼喇?你哋仲夠膽話自己唔係「渣」男「渣」女?! 等本鬼念返句靜心經淨化你哋:「食到幾多,就嗌幾多,冇人可以控制我!食到幾多,就嗌幾多,冇人可以控制我!食到幾多,就嗌幾多,冇人可以控制我……」

食飯之前,記得學本鬼念吓靜心經,保持理智唔嘥嘢,斷絕對食物有過多嘅慾望喇~

【鬼鬼為你代言】

【鬼鬼為你代言】

鬼馬又得意嘅sticker,你唔係唔用啊嘛~

呢輯萬用WhatsApp貼圖包,模擬真實食飯場景,再配合本鬼同慳BB奧斯卡級嘅精湛演技,完美呈現各位「惜食之人」食飯嗰陣嘅內心小劇場。

想提醒身邊嘅朋友要「惜」食唔駛靠把口,試下用sticker盡訴心中情喇!(動態同靜態都有㗎~)叫埋朋友一齊參加食物清碟大行動,齊齊響應惜食咪嘥嘢喇~

食物斷離捨 - 靜態Stickers:http://bit.ly/3VkKRtI
食物斷離捨 - 動態Stickers:http://bit.ly/3gKiXYT

【清碟話咁易】

【清碟話咁易】

我實在唔捨得畀食物清碟大行動咁快完,決定延長至12月18日,而且玩法更簡單!

1) 清碟後同佢影張靚相
2) 放上以下呢個post嘅留言區
傳送門: https://bit.ly/3UOrgkO
3) Hashtag #食物斷離捨 或 #FoodMinimalism
4) 標註 @bigwaster.hk , @ecc1990 同 @3位朋友

挑戰次數愈多,愈有機會贏獎賞!如果大家夠創意夠踴躍~ 本鬼嚟緊會加碼送出神秘大獎!

仲有仲有仲有~你哋再喺上面條link留言分享「食物斷離捨」小貼士,最有創意嘅30位參加者,除咗可以同本鬼一齊去「O·PARK1」之外,本鬼仲會送多隻鬼鬼頭吊飾畀你~

【「鬼 」同你加碼】

【「鬼 」同你加碼】

叮!叮!叮!不斷收到大家tag我嘅通知,撩起咗本鬼心中嘅一團火,本鬼感覺到喺呢個moment我要爆喇!

為咗答謝大家對本鬼嘅厚愛,以及對清碟嘅熱誠,我冇辦法唔爆出~大~絕! 係絕版個絕呀!就係我嘅絕版手辦模型一隻!

係咪好想要呢? 即刻參加食物清碟大行動,花啲心思,上傳最「攪鬼」嘅清碟相片到自己FB/IG或者以下條link嘅留言區喇!只要本鬼覺得你最有趣,又影到你清晒碟上嘅食物,就會將呢隻珍貴嘅手辦模型送畀你,全銀河系得一隻,好珍貴㗎!

快啲爆發你無窮無盡嘅小宇宙,參加食物清碟大行動,只要你嘅清碟相得到本鬼嘅歡心,就可以帶我個樣嘅絕版手辦模型返屋企㗎喇!

提提你~你哋再留言分享「食物斷離捨」小貼士,最有創意嘅30位參加者,除咗可以同本鬼一齊去「O·PARK1」之外,本鬼仲會送多隻鬼鬼頭吊飾畀你~

留言區傳送門:https://bit.ly/3UOrgkO

【渣男罪行】

【渣男罪行】

講起就火都嚟!最近本鬼聽朋友吖Pudding講,佢遇到個渣男,最初話會珍惜佢,點知轉個頭就一手揼咗佢落垃圾桶!Literally係垃圾桶呀!

講真,你食唔晒就唔好嗌喇,嗌咗成個布丁返嚟,一啖都冇食過就話唔要,唔係渣男係咩呀!嗱,本鬼知道「亂咁嗌食唔晒」呢個行為係唔受性別限制,總之唔理「渣男」定「渣女」,一概都唔要得!

記住喇唔該,食得晒,先好嗌,唔想畀人話係「渣男渣女」,就梗係要清碟畀人睇喇!一齊參加食物清碟大行動,將清咗嘅碟upload上FB / IG喇,記得加埋hashtag呀!

食物清碟大行動詳情: https://bit.ly/3UOrgkO

【你今日清咗碟未?】

【你今日清咗碟未?】

好喇,本鬼要出手喇,清碟咋吓嘛,簡直100% 輕輕鬆鬆開開心心冇難度!你估本鬼仲係當年眼闊肚窄嘅大嘥鬼呀?!食完餐飯隻碟清到立立令呀,惜食KOL呢個名銜,本鬼絕對係當之無愧!

當然,本鬼都唔慣獨食出風頭,所以我就要挑戰,吖唔係,係畀機會你、你、仲有你同我一齊做惜食KOL!我而家就tag我老友留心蛋 Mr. Safegg、屋宇署 Buildings Department嘅阿標同阿丁、Geo Channel 土力場、清潔龍阿德 Keep Clean Ambassador Ah Tak同埋下水水 Drainy,一齊玩呢個食物清碟大行動,玩法超簡單~獎品勁豐富:https://bit.ly/3Hsb7y0

提提你~你哋再留言分享「食物斷離捨」小貼士,最有創意嘅30位參加者,除咗可以同本鬼一齊去「O·PARK1」之外,本鬼仲會送多隻鬼鬼頭吊飾畀你~

各位朋友,等你哋出手喇!

【食物清碟大行動最後召集】

【食物清碟大行動最後召集】

不知不覺間,食物清碟大行動已經嚟到最後幾日,本鬼真係好唔捨得……

你哋嘅努力本鬼都睇得一清二楚,就好似你哋隻碟咁清到一乾二淨~

想得到全銀河系唯一一隻嘅本鬼絕版手辦模型,就要把握最後衝刺機會,上傳最「攪鬼」嘅清碟相到自己FB/IG或者以下條link嘅留言區。只要本鬼覺得你最有趣,又影到你清晒碟上嘅食物,就可以帶本鬼絕版手辦模型返屋企㗎喇!!

仲有仲有仲有~你哋再喺下面條link留言分享「食物斷離捨」小貼士,最有創意嘅30位參加者,除咗可以同本鬼一齊去「O·PARK1」之外,本鬼仲會送多隻鬼鬼頭吊飾畀你!

留言區傳送門:https://bit.ly/3UOrgkO

就算今次食物清碟大行動活動完咗,大家都要記住食得晒先好嗌,做個「惜食KOL」呀!

【渣女罪行】

【渣女罪行】

唔好睇身邊啲女仔朋友斯斯文文,其實掉嘢嗰陣可以毫不留情!

碟飯食咗少少就已經「移情別戀」投向甜品嘅懷抱,呢個渣女。好心你冇咁大個胃,就唔好咁貪心喇!未食晒又繼續嗌,然後就咁「無情」拋棄咗最初碟飯,你有冇諗過佢嘅感受啊!?

本鬼提醒你,食得晒先好嗌,做返個負責任嘅人,唔好做「渣男渣女」啊!!

【那些「廚餘」教會我們的事 #果皮篇】

【那些「廚餘」教會我們的事 #果皮篇】

嘩!一入廚房就聞到一陣清新嘅香氣~本鬼崇尚天然,又點會噴空氣清新劑呢?其實係用咗果皮整嘅家居清潔劑咋!

果皮除咗可以拎去做肥料,仲可以變身成有機清潔好幫手。你鍾意用橙皮又得,檸檬皮又得,再加糖加水,將所有材料放入個樽度,攪拌搖勻,發酵3個月後就可以用㗎喇!

呢啲環保酵素 可以代替化學清潔劑,用嚟洗碗同清潔廚房就啱晒喇!

下次食完生果,記得要留返啲果皮啊~

【食物清碟大行動:得獎者名單公布】

【食物清碟大行動:得獎者名單公布】

本鬼好榮幸可以同大家宣布,今次嘅食物清碟大行動已經完滿結束喇!多謝「惜食」嘅你參加!

呢班得獎者好犀利,累積清碟嘅打卡數量,令本鬼呢個資深「惜食 KOL」感到老懷安慰,忍唔住要大大力嘉許你哋!

詳細得獎者名單:https://bit.ly/3FHFNsB

各位得獎者記住喺2023年1月2日前私訊(inbox message)我哋,安排領獎~

今次嘅食物清碟大行動戰況激烈,無論你有冇得獎,應承本鬼從今以後都要keep住團火,繼續清碟,惜食咪嘥嘢!本鬼嘅「惜食」之路仲未完㗎,記住密切留意本鬼有關「食物斷離捨」嘅最新動向啦~

2023年

【分手要狠,更要有技巧】

【分手要狠,更要有技巧】

有啲壞習慣你估話分手就分手咩?同壞習慣分手除咗要狠,仲要有技巧~

鬼鬼大師教你兩招~

技巧1
嗌嘢食切忌衝動!出街食飯起勢咁嗌,食唔晒就當然浪費啦;食得太飽又會影響健康!不如試吓食晒,唔飽先再嗌,食到七成飽就Perfect。

技巧2
記得慢慢~慢慢~食~畀啲時間身體慢慢消化,錫住自己個胃先可以食到更多好西架嘛~

學識以上技巧,日夜Practise,你就可以輕鬆同嘥鬼壞習慣分手,同本鬼一樣重獲新生喇~

【廚餘可以有幾勁?】

【廚餘可以有幾勁?】

廚餘唔係廢物,而係可以回收嘅有用資源,究竟點樣可以善用呢股廚餘之力呢 ?等本鬼話你知喇!

「O · PARK1」 作為香港首個大型有機資源回收中心,每日可以處理200公噸廚餘,幫手減輕堆填區嘅負擔。「O · PARK1」仲會將廚餘轉廢為能,每年輸出大約1,400萬度剩餘電力 ,即係相等於大約3,000個家庭嘅用電量,分解後嘅殘餘物仲會轉化為堆肥~用嚟種花為環境扮吓靚,或者種吓菜種吓其他農作物都得㗎,呢啲咁有意義嘅堆肥除咗交畀政府部門同園藝公司用嚟美化園景,仲可以送畀參觀「O · PARK1」嘅訪客𠻹~

雖然我哋有廚餘之力轉廢為能,但係我哋依然要惜食咪嘥嘢,由源頭減少廚餘,實行食物斷離捨㗎~

【唔「惜」搵鬼問 -「包底」日常篇】

【唔「惜」搵鬼問 -「包底」日常篇】

為咗另一半,赴湯蹈火,在所不辭!「包底」?濕濕碎喇~食多啲先可以成為穩「重」嘅伴侶(苦笑)保護BB豬嘛~(內心讀白:喂呀,恃住有人「包底」就亂咁嗌,食到嘔都食唔晒。)

計本鬼話~不如食幾多嗌幾多,咁咪唔嘥嘢又唔怕傷胃傷感情囉 ~

【唔「惜」搵鬼問 - 媽媽的愛篇】

【唔「惜」搵鬼問 - 媽媽的愛篇】

世上只有媽媽好~每次返屋企食飯,鬼媽都會煮一枱本鬼最鍾意食嘅餸,感動嘅同時,都覺得好驚......好驚煮咁多我哋食唔晒啊!

不過,食唔晒都唔會嘥嘢嘅!因為我哋會pack起佢,好好存放,第二日再食,咁咪唔會浪費食物同媽媽嘅心機囉~下次煮飯前記得提媽媽,食幾多就煮幾多,煮多咗食唔晒就嘥晒㗎喇!

【唔「惜」搵鬼問 - 教「惜」細路哥篇】

【唔「惜」搵鬼問 - 教「惜」細路哥篇】

同小朋友出街食飯,嗌嘢食嗰陣都幾頭痛……究竟嗌咩食同嗌幾多好呢?有時嗌多咗,連爸爸媽媽幫手食都食唔晒,唉~咁點算好?

不如試吓同小朋友溫馨share一個餐,一齊食晒先再嗌。用行動話畀佢哋知要「食幾多,就嗌幾多」,從小培養「惜」食習慣 ~咁就人人都惜食唔嘥嘢喇~

【唔「惜」搵鬼問 -貪心嗌加大又食唔晒篇】

【唔「惜」搵鬼問 -貪心嗌加大又食唔晒篇】

你以為嗌套餐加大就等於幸福加大?實際係將你浪費食物嘅可能性加大咋!

平時你食一個餐都夠飽,點解要貪心嗌加大呢?加咗錢但最後食唔晒,簡直係嘥嘢食又嘥錢呀!記住,食幾多就嗌幾多,冇咁大個胃就唔好嗌加大喇!

【唔「惜」搵鬼問 -大頭蝦篇】

【唔「惜」搵鬼問 -大頭蝦篇】

肚餓嘅時候,好多人都會「斷線」,將本鬼講過嘅嘢忘記得一乾二淨。不過~我知你哋都唔係有心嘅,只要身邊有人提提你,其實你都可以「惜」食唔嘥嘢㗎~

好似香港大學嘅canteen咁,職員都會喺點餐時主動問吓同學仔使唔使「少飯」,咁細食啲嘅同學仔叫咗少飯,就冇咁容易浪費食物喇~

【唔「惜」搵鬼問 - 特價貨品要「惜」買篇】

【唔「惜」搵鬼問 - 特價貨品要「惜」買篇】

特價喎,而家唔買等幾時?

都係嘅……不過掃貨嗰陣有冇留意幾時過期先?過期前都食唔晒,隨時由慳錢變嘥錢啊!

下次見到超市大特價唔好咁興奮住,入貨都要睇清楚食用期限啊!買多咗嘅話可以同其他親戚朋友share,咁咪唔怕嘥嘢囉~

【唔「惜」搵鬼問 - 教「惜」細路哥篇】

【一班人食飯,識叫唔「惜」食?】

【一班人食飯,識叫唔「惜」食?】

一班人食飯梗係要食晒啲嘢先至夠盡興,但你哋個個食兩啖就停晒手,準備散場時仲剩到成枱都係,認真掃興!既然有時間,不如坐多一陣,食埋先走喇!一邊傾計一邊食,畀啲時間自己消化,咁咪唔使嘥嘢,又可以慢慢敘舊囉~

記住,離開餐枱前,盡量清乾淨枱面嘅嘢食!真係食唔晒嘅話,都可以打包返屋企加餸~

惜食咪嘥嘢,咁就大家都可以盡興而歸喇~

【帶咗飯又想出街食?NO WAY!】

【帶咗飯又想出街食?NO WAY!】

慳BB居然約本鬼食lunch?呢個千載難逢嘅機會,本鬼梗係要......嚴正拒絕喇!

實不相瞞,本鬼的確係好想同慳BB撐枱腳,可惜鬼媽已經準備咗愛心飯盒畀我!既然本鬼帶咗飯,就要對個飯盒負責,唔可以畀佢白白浪費!

等我即刻同慳BB約定日子食飯先!咁就唔會同鬼媽嘅愛心飯盒撞到正喇~

【經典金句——粒粒皆辛苦】

【經典金句——粒粒皆辛苦】

350、351、352......本鬼每晚都要食800粒米先夠飽,死喇!而家數到幾多?!
(慳BB os:幾時先開飯啊......)

正所謂「粒粒皆辛苦」,每嘥一粒米飯,都會破壞地球嘅環境!唔想製造廚餘,本鬼咪唯有數清楚啲米囉!

嗱~聽本鬼講,由今日開始,一定要食得晒先好嗌,食唔晒就嗌少飯,咁咪唔駛辛苦數米,又可以做個「有衣食」嘅鬼粉囉~

【瑕疵水果易容術】

【瑕疵水果易容術】

呢個世界,好多人都淨係睇樣唔睇內涵!

有時返到屋企發現買返嚟嘅水果壓扁咗,就當係廚餘咁丟咗佢?佢哋個樣唔靚啫!唔代表佢哋已經唔食得㗎!

水果充滿內涵,就算外表唔見得人,都仲好有用㗎~本鬼同大家開心share「水果易容術」將佢哋「改頭換面」,整成果醬攞嚟搽麵包,咁就唔洗丟咗佢,又可以食多幾餐喇~

做法好簡單:
1. 將果肉切粒然後搗碎。
2. 用細火慢煮果肉,加入少許檸檬汁攪拌。
3. 煮滾之後加入砂糖,再慢煮5-20分鐘。
4. 當果醬煮成你滿意嘅濃稠度,就完成喇!

【留下來的廚餘】

【留下來的廚餘】

【一班人食飯,識叫唔「惜」食?】

食完飯,清晒碟,鬼媽竟然將啲廚餘同其他垃圾一次過掃晒落垃圾桶?

睇真啲!咖啡渣、果皮同蛋殼都唔係一般嘅垃圾嚟㗎!只要動吓小腦筋,就可以將佢哋升級再造變成天然嘅清潔劑,又或者用嚟做植物嘅肥料,仲有更多創意用途等你發掘~等本鬼都分享幾個善用廚餘小貼士比大家喇:

1. 咖啡渣可以除味、清潔去污同防蟲
2. 果皮可以製造成環保酵素代替化學清潔劑
3. 雞蛋殼可以搗碎作為肥料

只要佢哋仲有價值,本鬼都唔會輕易放過!以後飯前飯後,一齊做多步,睇吓有冇廚餘可以好好利用喇!